Declaración de política ERASMUS+
CIFP A Granxa
DECLARACIÓN DE POLÍTICA ERASMUS
O CIFP A Granxa de Ponteareas é un centro educativo público de Galicia que imparte varios Ciclos Formativos de Formación Profesional (VET / HED) de Grao Superior. Estes estudos pertencen á etapa de Educación superior e inclúen o módulo obrigatorio de Formación en Centros de Traballo ( FCT) a realizar en empresas dos sectores profesionais correspondentes.
Os Proxectos Curriculares dos Ciclos de Educación Superior, así como os currículos oficiais do Goberno de Galicia e a actual lexislación vixente no Estado Español establecen como obrigatorias as prácticas en empresas (FCT) e asemade fomentan a mobilidade europea.
O CIFP A Granxa participa en programas e accións europeas (KA) para promover as mobilidades de estudantado e profesorado. Os e as estudantes de Formación Profesional poden realizar as prácticas de formación obrigatorias en empresas ou institucións noutros países da Unión Europea mediante o programa Erasmus+. O estudantado do centro ten feito mobilidades a países como Polonia, Italia, Francia e Portugal, e o profesorado participou en jobshadowings de ERAMUS en Noruega, Grecia, Portugal, Finlandia, entre outros.
As accións prioritarias desde o centro para o programa Erasmus+ son as seguintes:
- Promover a mobilidade de estudantes en empresas europeas.
- Divulgar o Programa ERAMUS+ de diversas maneiras destacando a accesibilidade.
- Apoiar a preparación lingüística e cultural do estudantado como compromiso de calidade.
- Recoñecer academicamente as actividades realizadas polos alumnos e de maneira oficial a do profesorado.
- Implementar a dixitalización das mobilidades ERASMUS.
- Fomentar as practicas respectuosas co medio ambiente.
-Impulsar a participación de persoas con menos oportunidades.
-Animar e promover o compromiso cívico.
A participación do noso centro no programa Erasmus ten como obxectivos:
- Mellorar a calidade e atractivo do ensino de Formación Profesional (VET/HED) no noso centro.
- Fomentar a Competitividade, espírito empresarial, habilidades e competencias requiridas na contorna laboral europea.
- Fomentar e enriquecer a aprendizaxe de linguas europeas e o coñecemento de culturas de distintos países da Unión Europea e impulsar a integración das distintas culturas.
Con respecto á difusión do Programa Erasmus desde o centro realizaranse as seguintes accións:
- Publicar páxina web do centro a Declaración de Política Erasmus e as convocatorias e formas de solicitude do Programa.
- Difusión de información das convocatorias mediante carteis no centro.
- Charlas informativas, reunións co alumnado e profesorado; mostrar experiencias previas doutros alumnos.
O centro cumpre cos obxectivos de non discriminación e comprométese a promover a igualdade entre sexos, culturas e relixións. Fomentarase a defensa dos dereitos humanos e a democracia, avivando a loita contra calquera forma de racismo e xenofobia.
O Programa ERAMUS+ do CIFP A Granxa garántese mediante unha comisión formada pola Coordinación de Programa Internacionais, e Equipo Directivo do centro, e todos o profesorado implicados nas actividades. Este proceso non só será garante de calidade senón modelo e marco de referencia de mellora das distintas actividades do programa. Con respecto ás estancias en empresas crearanse acordos de colaboración e formación oficiais individualizados para cada alumno e estancia empresarial.
As actividades de formación de estudantes e profesorado serán recoñecidas, concretamente no caso das mobilidades para estudantes con empresas serán recoñecidas para todos os efectos coma se fosen realizadas en España.
Estratexia para a organización de proxectos Erasmus+
- O CIFP A Granxa realiza proxectos para realización de prácticas en empresas de estudantado e formación de profesorado baixo o Programa ERASMUS+.
- O centro imparte varios Ciclos Formativos de Grao Superior, que teñen un módulo obrigatorio de prácticas en empresas no segundo ano do ciclo ( FCT) . A nosa estratexia é presentar ao alumnado de primeiro ano a posibilidade de realización de prácticas no países da Unión Europea e fóra, motivándoos e informándoos das vantaxes que supón a mobilidade. A comisión do Programa de Mobilidades ERASMUs+ estima o número de mobilidades que se solicitará seguindo un criterio de selección fixado previamente.
- O profesorado da etapa de Educación Superior poderá realizar formación ERASMUS preferiblemente cando o alumnado se atope realizando as súas prácticas en empresas. A formación recibida debe ser relacionada coa educación, a reciclaxe profesional, a investigación ou a innovación. Previamente á realización dunha estancia formativa, o profesor debe emitir un informe a unha comisión do centro que avalíe a idoneidade da mesma. Unha vez realizada a mobilidade, o profesorado fará a difusión da mesma ao resto de profesorado do centro.